Onder die Brug Hoofstuk 9, Wanneer die Waarheid Skeur

Onder die Brug Hoofstuk 9, Wanneer die Waarheid Skeur

deur RooiMier 

Elton sit doodstil. Nie ’n woord kom uit nie. Twee dinge moet hy verwerk: die verligting dat sy pa nie ’n verkragter was nie, en die verraad — dat sy vrou al jare lank met een van sy vriende geslaap het.

John besluit om hom ook in te lig oor Drew se dreigement. Maar voordat hy iets kan sê, hoor hulle ‘n geluid by die deur. Jolene staan daar — bleek, geskok. Sy sê niks. Sy draai net om en verdwyn gang-af. Elton staan op en stap kamer toe. John laat hom gaan. Hy kyk by die deur uit, maar Jolene is nêrens te sien nie. Hy sluit die deur. As sy nie ‘n sleutel het nie, sal sy sekerlik klop.

Hy gaan sit. Was dit die regte ding om te doen? Hy kyk na bo.

"Here, U moet maar onderneem."

Hy begin bid — ‘n lang, eerlike gebed. Tydens sy gebed hoor hy snikke. Later ‘n sagte stem:

“Dankie vir U genade, Here. Here, ek is stukkend… en tog ook verlig. Dankie vir die waarheid. Gee my krag om te vergewe.”

Dan raak dit stil.

John voel ’n mate van verligting, maar tog knaag die bekommernis. Wat gaan Drew doen? Was dit net leë dreigemente? Met daardie vrae in sy kop raak hy aan die slaap.

---

Die volgende oggend hoor hy vroeg die voordeur oopgaan. Jolene se voetstappe in die gang. Hy kies om eerder nog ’n rukkie te lê. Elton is ook nog nie op nie.

Teen negeuur staan hy op. In die kombuis hoor hy Jolene se driftige stem. Elton se antwoord is kalm. John wonder: Hoe gaan hierdie Sondag verloop?

Later kom Elton by hom in.

“Dankie, Oom,” is al wat hy sê.

“Ek gaan uit, en Jolene gaan na haar ma toe. Hier is geld — koop vir jou iets vir middagete. Ek sien jou later.”

Hy stap by die deur uit. Jolene volg kort daarna sonder ’n woord. Sy klim by hom in die kar. John vermoed hy gaan haar iewers aflaai.

---

Die volgende oggend verlaat Elton weer die huis — om homself aan te gee.

---

Twee maande later.

Die huis voel swaar. Stil. Ongemaklik.

Elton wag op sy verhoor. Jolene is bitter — sy voel hy moes nooit homself oorgegee het nie. En dan boonop het hy sy werk verloor.

Drew se familie versprei stories. Hulle sê vir almal John het hulle lewens verwoes. Hulle dreig die pastoor, sê hy moet kant kies. Maar die pastoor antwoord net:

“Ek staan aan die kant van geregtigheid en regverdigheid.”

Jolene maak dit ondraaglik vir John in die huis. Sy blameer hom vir alles. Hoewel dit lyk of Elton haar vergewe het, is daar steeds spanning. Dinge is… hak en tak.

John weet dis tyd om te gaan.

“Waar gaan Oom bly?” vra Elton een oggend.

John antwoord eenvoudig: “Ek sal ’n plan maak.”

Daardie oggend, voor sonop, pak hy sy sak. By die voordeur bedank hy Elton en Jolene. Elton druk geld in sy hand.

“Bel my as jy kan,” sê hy.

“Ek sal,” belowe John.

Verbeel hy hom... of lyk Jolene verlig?

Hy stap tot in Voortrekkerweg, en besluit om die eerste taxi Kaap toe te vat.

Wat hy daar gaan doen, weet hy nie.

Maar hy sal besluit as hy daar kom.