Onder die Brug Hoofstuk 8, Die Skaduwee van Verraad

Onder die Brug Hoofstuk 8, Die Skaduwee van Verraad

deur Rooi Mier

Na maande se getroue diensbywoning het John besluit om sy lewe heeltemal te verander. Hy dien nou die Here met oorgawe. Intussen het hy ’n goeie verhouding met Elton sowel as met die pastoor opgebou. Weens sy ouderdom kry hy slegs tydelike werk, wat hom genoeg tyd gee om saam met die pastoor deur te bring. Dit het daartoe gelei dat sy verhouding met God standvastig en diep gewortel geraak het.

Hy was juis op pad na die pastoor se huis toe. By sy aankoms hoor hy stemme van agter die huis af. Nadat hy geklop het en niemand oopgemaak het nie, besluit hy om om te stap na waar hy die stemme hoor. Terwyl hy langs die huis afstap, hoor hy Jolene se naam en gaan staan stil om te luister.

“Jy sê daai ding, boeta Drew — jy het Jolene verkrag. Ek dink tog jy en Elton was soos broers.”

“Dis so, ja, maar ek het haar nog al die tyd begeer. Wat hy nie weet nie, is dat sy die hele tyd ook met ’n ander vriend geslaap het terwyl hy en my broer weg was met kerksake.

“Daardie dag het ons almal by haar huis gedrink en dronk geraak — behalwe ek. Haar skoonpa was ook daar, maar ek het gesorg dat hy behoorlik drink. Jolene was toe al baie dronk. Ek het die ander ouens huis toe gery en daarna teruggegaan. Toe ek daar aankom, was sy uit soos ’n kers. Haar skoonpa het op die bank geslaap. Ek het haar kamer toe gedra en haar verkrag. Ná die tyd het ek gedink sy sou dalk agterkom wat gebeur het, toe dra ek die ouman kamer toe, trek hom uit en lê hom langs haar neer.”

John draai geskok om en beweeg in die rigting van die hek. Die pastoor se broer!

Voordat hy die hek bereik, hoor hy:

“Boeta John, soek jy my broer?”

John kan nie antwoord nie — te ontsteld.

“Daai ou tree vreemd op, boeta Drew. Lyk my hy het gehoor wat ons praat.”

John stap vinnig verder sonder om om te kyk.

By die huis gaan hy reguit kamer toe sonder om Jolene te groet. Sy gee ook nie juis om nie. Die volgende paar dae vind hy dit moeilik om Elton in die oë te kyk en hy hou hom eenkant. Die pastoor wou hom een oggend kom haal om saam uit te gaan, maar hy het gesê hy voel nie goed nie.

Hy wil vir Elton vertel dat sy pa nie ’n verkragter was nie, maar besluit om eers in die kerk daaroor te bid.

Daardie Saterdagoggend kon hy skaars na die Woord luister. Ná die diens praat Elton met die pastoor terwyl John kar toe stap. Drew kom van die straat se kant af ingestap en dreig hom:

“As jy vir Elton vertel, gaan hy saam met my tronk toe. Toe hy nog dwelms gebruik het, het ons iemand per ongeluk doodgery en weggejaag. Later het ons teruggegaan, die liggaam gekry en dit gaan wegsteek in ’n gebied ver van hier af.”

Elton en die pastoor stap nader. Drew groet John “vriendelik” met die hand en sê hardop:

“Ons praat weer, boeta John.”

Hy waai vir sy broer en stap by die kerkgrond se hek uit.

Op pad huis toe is John baie stil. Elton probeer gesels oor die boodskap van vroeër, maar John antwoord skaars.

“Oom moet praat as daar probleme is. Is dit weer Jolene?”

John sê nee en kyk by die venster uit. By die huis gaan hy reguit kamer toe.

Hy val op sy knieë en bid:

“Here, hoe nou gemaak?”

Dit is vir hom belangrik dat Elton van sy pa se onskuld moet weet — maar hoe? Gaan hy die oorsaak wees dat sy broerskind in die tronk beland? Toe onthou hy dat Elton eendag gesê het dat hy tydens sy dwelmmisbruik by iets vreesliks betrokke was. As Christen sou hy dit een of ander tyd van sy skouers moes afkry.

Hy onthou ook Elton se gunsteling Bybelvers — Romeine 8:28:

“En ons weet dat vir hulle wat God liefhet, alles ten goede meewerk, vir hulle wat na sy voorneme geroep is.”

Dit het ook sy eie gunstelingvers geword.

Daardie aand besluit John om vir Elton alles te vertel.