#Stukkendeharte S2 Hfst 50 - Rooi Mier

Sahara wonder tog waar Max hom bevind. Sy maak die effense bekommernis af as nuuskierigheid.

"Ek wonder wat uiteindelik met hom gaan gebeur? Gaan die polisie hom vang en weer tronk toe stuur? Sal hy gesond word want hy was nog nie heeltemaal buite gevaar nie? Was hy uit die hospitaal ontvoer of het hy sy ontsnapping gereël?

Dit is definitief nie lekker om Max as jou pa te hê nie. Die mense begin my snaaks aankyk. Iewers het iemand uitgelek dat ek Max se dogter is.

Het ek ook sy wreedheid geêrf? Dit sal beter wees dat ek nie trou nie. Sê nou net my kinders gaan eendag na hul oupa aard?"

Die een vraag na die ander. Sy het al probeer skryf maar niks. 

"Al wat my nou rustig gaan maak is 'n gedig wat ek self skryf of die tweeling.

Dit is te laat vir besoek aan laasgenoemde en ek kan nie eers een reël van 'n gedig begin nie."

Sy besluit om Shane te skakel. Miskien weet hy iets oor Max.

"Shane Cupido goeie naand."

"Goeie naand Speurder Cupido. Dit is Sahara Muller hier.

Kan jy my enigiets sê oor my …. oor Max?"

"Sahara! Wat 'n verrassing. Ongelukkig is daar niks oor hom nie. Ons vermoed hy is ontvoer.

Het hy jou nie kontak nie?"

"Nee, hoekom vra jy nou so 'n vraag?"

"Jammer dat jy so voel. Ek is 'n speurder onthou. As ek nie die vraag vra nie doen ek nie my werk nie.

Belowe my jy sal my onmiddelik laat weet as hy probeer.

"Ek dink ons moet iemand kry om jou te beskerm."

"Het Max nie onder julle bewaking uit verdwyn nie?"

"Ja dit is so."

Shane klink afgehaal deur haar venynige, sarkastiese vraag.

Sy besef dit.

"Jammer Speurder. Ek het dit nie bedoel nie. Vandag is ek nie myself nie."

"Ek verstaan. Sodra ek iets hoor sal ek jou laat weet."

Hy wag nie tot sy die oproep beeïndig voor hy afdruk nie.

"Max gaan my nog my beroep kos. Ek beter mý emosies reg kry.

Hulle het alreeds vir Rencia Witbooi gegee om saam met hom te werk. 

Rencia! Hoekom bly die vrou in my kop? Ek kan nie eers meer 'n paar minute gaan sonder om aan haar te dink nie. Sy maak dit ook nie juis makliker nie. Daar is 'n uitlokkende aantrekkingskrag aan haar en ek dink sy is nie eers bewus daarvan nie."

Shane sit en staar droomverlore teen die muur oorkant hom.

"Kom nou Shane. Jy verloor fokus. 

Daar is nog die feit dat Valencia Smith verdwyn het. Dit is die tweede keer. Sy het voorheen ook verdwyn en ons het haar in Chicago by 'n kollege opgespoor waar sy Verpleegkunde studeer het.

Met Max wat weer verdwyn het kan sy dalk in gevaar wees. Die plek waar sy gehuur het staan leeg maar is glo vooruit betaald vir drie maande. Sy het gesê dit is haar kennisgewingstydperk.

Ons wil nou nie onbevoeg voorkom nie maar ons sal dalk Interpol se hulp benodig."

Yvonne sien Paul en Larry by die winkel uitkom. 

"Ek moet sê hy lyk nog goed. Altans, hy lyk beter as wat ek kan onthou."

Yvonne betrap haarself dat sy eintlik na Larry kyk.

"Natuurlik Yvonne. Wees maar eerlik met jouself. Jy het nooit van Larry vergeet nie.

Ek het myself wysgemaak dit was omdat hy my gered het destyds dat ek so gevoel het. Die probleem is dat daar nou al soveel tyd verby gegaan het; ek kan mos nie nou nog bewondering vir hom voel nie. Dié gevoel is meer blywend."

Yvonne klim uit die motor en kyk totdat hulle om 'n hoek stap.

Max lê wakker. Sy gedagtes werk oortyd.

"Hoe gaan ek uit hierdie penarie kom? As ek net iemand kon kontak.

Yvonne sal my beslis nie help nie want dit is duidelik dat Selwyn, of soos hy nou genoem wil word, Andy, haar goed beloon.

Dalk moet ek die ander verpleegster probeer of  dalk selfs die dokter.

Almal het 'n prys."

Hy voel nog liggamlik swak en weet dat hy nie iemand fisies kan oorrompel veral sonder 'n vuurwapen nie. 

"Geld wat stom is, … Andy Ryneveld, hoe durf jy Max Adriaanse probeer aanvat!"

#RooiMier

©Rooi Mier 17.01.2023