#Stukkendeharte S2 Hfst 13 - Rooi Mier

Derek Louw is buite homself waar hy saam met 'n soekgeselskap al langs die rivier soek. Hy is nie 'n man van geweld nie maar hy het op 'n keer vir Larry voor die bors gegryp en hom met 'n vuishou bygedam. Hy weet hy het 'n donker verlede en hy het my dogter en kleinkinders se lewe in gevaar gestel. 'n Polisieman wou hê dat Larry hom moet aankla maar Larry het gesê hy verstaan hoekom dit gebeur het.  Nou sorg Larry maar net dat hy nie in dieselfde groepie as Derek soek nie.

"Ek moet vir Angela bel om te hoor hoe gaan dit met Janice."

Angela antwoord onmiddelik.

"Ek sou jou nou net gebel het. Het hulle al my poplap gekry? Sê tog hulle het."

"Nee Angela. Ons soek nog. Die polisieduikers kan eers môre voortgaan maar ons hou aan soek. Hou moed my vrou.

Hoe gaan dit met Janice?"

"Hulle het haar oorgeplaas Mediclinic toe. Sy is op die oomblik in die operasiesaal. Hulle kyk of hulle die patroon veilig kan verwyder. Ek gaan nou gebedskamer toe. Ons kind gaan dit maak want ek glo my God doen nog steeds wonderwerke. Ons praat later."

Bennie kom oor om te hoor hoe dit met Janice gaan. Nadat Derek hom ingelig het bel hy Iris om haar ingelig te hou. Sy pas vir Lorenzo op by die huis. Noudat hy slaap kon sy uitlating gee en het vreeslik gehuil.

"Here, hou ons prinsessie veilig asseblief."

Sahara en Martin was nog steeds in Saldanha toe sy die nuus ontvang. Sy is moeg want sy was al vroeg op vanoggend. Dié nuus het haar oorweldig. Hulle moes haar suikerwater ingee. Sy wil sommer onmiddelik in die motor klim en Upington toe ry maar Martin moes haar oortuig sy kan nie en dit is ver. Hy stel voor dat sy eers hoor wat Lawrence se planne is.

Lawrence blaas ongeduldig op sy toeter. 

"Hoekom kom Larissa nie uit nie? Hy ry sommer sonder haar."

Sy foon lui. Dit is Sahara.

"Waar is jy Lawrence?"

"Ek laai net gou vir Larissa op by die universiteit dan ry ons Upington toe. Daar is eers môremiddag 'n vlug."

Larissa is besig om in die motor te klim.

"Kan jy my iewers op die N7 kry asseblief? Iemand gaan my neem hier uit Saldanha."

"Waar op die N7?"

"Ry maar, ek sal Larissa bel. Jy bestuur mos. Shane Cupido, die speurder, gaan my neem."

Terwyl Larissa en hy ry wonder hy wat sy met Shane in Saldanha doen. Is hy dan nie getroud nie?

"Derek, Janice het nou net uit die operasiesaal gekom. Die patroon is suksesvol verwyder maar .."

Angela raak stil.

"Wat is dit Angela. Praat met my." 

"Die patroon het haar ruggraat beskadig. Sy ….. sy sal moontlik verlam wees."

"Nee dit kan nie wees nie. Is hulle verseker? Daar moet 'n fout wees."

"Moontlik Derek, nie definitief nie."

"Wat het ons dan gesondig Angela? My dogter is moontlik verlam en my kleindogter is wie weet waar; dalk in die hande van 'n maniak.

As daar 'n God is, is dit nou die tyd dat Hy Sy gesig moet wys."

"Moenie so praat nie my man. Ons dogter gaan lewe en ek weet ons gaan Lanice kry. God sal ons nie teleurstel nie."

Max is briesend.

"Jy het die verkeerde persoon geskiet? So G lewe nog?"

"Ja meneer. Net toe ek skiet toe .."

"Ek wil nie hoor nie. Jy het my gefaal. As daai G verdere moeilikheid vir my veroorsaak moet jy solank begin hardloop. Die einde van die wêreld is nie te ver vir my nie."

"Maar meneer?"

Max lui af.

"Ek sal moet geld uit my Luno rekening in my bankrekening oorplaas.

Hulle dink daai paar rand wat hulle gevries het is my enigste geld."

Max het vir hom 'n Luno rekening onder 'n valse naam wat op sy valse identiteit is oopgemaak. Met dieselfde identiteitsdokument het hy ook 'n buitelandse bankrekening oopgemaak. 

Hy is verseker hulle sal hom nie kan stop deur sy finansies af te sny nie. 

Lawrence kry vir Sahara by Moorreesburg waar sy en Shane 'n kort rukkie terug aangekom het. 

Na 'n rukkie se ry en die uitruil van inligting rondom Janice se skietery, kan Lawrence nie meer sy nuuskierigheid beteel nie. 

"Wat het jy en Shane dan saam in Saldanha gedoen?"

Larissa wat voor langs hom sit kyk hom aandagtig aan.

"Is Lawrence nog nie oor Sahara nie? Hoekom klink hy dan so bietjie jaloers?"

Sy sê hardop,

"Lawrence, dink jy jy mag haar dit vra? Sy het mos 'n persoonlike lewe ook."

"Ja maar sy is my, uh, my suster. Ek moet haar beskerm en die man is mos getroud."

"Nee, hy is nie. Hy is geskei."

"Ek is hier en kan vir myself praat broer en vriendin.

Antie Rachel, Max Adriaanse se vrou was vanoggend voor my doodgeskiet en julle stry oor my persoonlike lewe. 

Kom ons konsentreer liewer op wat in Upington gebeur het."

"Jammer sus. Ek het nie geweet nie."

"Ek is nou ok na berading. My bekommernis is oor ons prinsessie. Dink julle Max se manne …"

"Moenie dit sê nie sus. Moenie dit eers dink nie. Ek sal mal word."

"Ten minste is Janice nou stabiel. Mammie het nou net gebel voor ons jou opgetel het."

"Dankie Vader."

"Liefling, dink jy nie ook die vrou met die dogtertjie was vreemd nie? Die dogtertjie het bang gelyk en die vrou het soms gelyk of sy nie weet wat om haar aangaan nie."

"Ja my man. Sommige mense is maar vreemd. Uit Upington het sy nie 'n woord gesê nie behalwe ja toe ons sê ons gaan tot in Grobbelaarshoop."

Sy skakel die TV aan. Daar is 'n foto van die dogtertjie op die nuus.

"Kyk hier my man. Die dogtertjie het vroeër in Upington weggeraak. Haar naam is Lanice."

"Dan moet ons haar gaan red my vrou. Hulle sal hopelik nog op die hoofpad wees."

"Ek dink ons moet eerder die polisie bel."

"Hulle gaan dalk te laat wees. Ons bel hulle terwyl ons daarheen ry. Kom, daar is nie tyd nie."

©Rooi Mier 17.01.2023

#Stukkendeharte S2 Hfst 12 - Rooi Mier

Lanice sit met groot oë en kyk. Sy is verwonderd oor wat besig is om te gebeur. 

Lorenzo slaan teen die sitplek voor hom en probeer die sitplekgordel los maak met sy klein handjies.

"Mammie! Mammie! Ek wil my mammie hê. Oom Lally jy my mammie seelmaak. My mammie vol boed.

Bling my mammie oom Lally."

Die skok het Lorenzo so getraumatiseer dat dit lyk of hy 'n terugslag gehad het want hy praat nou soos toe hy drie jaar oud was.

Larry is self so in skok dat hy vergeet van die tweeling. Hy probeer 'n ambulans bel en kry dit blykbaar nie reg nie. 

Mense wat daar naby piekniek gehou het hardloop nader. Iemand bel die ambulans. 'n Vrou daar naby hoor Lorenzo en hardloop na die motor om hom te kry.

Janice haal moeilik asem. Larry wil haar optel maar 'n man hou hom teë.

"Jy kan nie, jy sal haar net verder beseer. Die ambulans gaan nou hier wees."

Lorenzo ruk los uit die vrou se hand en storm na Larry toe en slaan hom teen sy been.

"Jy mammie seelmaak oom Lally. Moenie Mammie seelmaak nie."

Dit ruk Larry terug na die werklikheid en hy tel Lorenzo op wat hom aanhou slaan teen die bors.

Skielik onthou hy van Lanice. Met Lorenzo steeds in sy arm stap hy na die motor toe.

"Lanice?"

Daar is niemand in die motor nie.

"Lanice, Lanice! Het iemand 'n klein dogtertjie gesien?

Lanice!"

Die vrou wat Lorenzo uit die motor gehaal het stap nader.

"Daar was net die seuntjie in die motor meneer."

"Nee, dit kan nie wees nie.

Lanice, Lanice! Waar is jy my prinsessie. Asseblief tog mense, bring haar hierheen as julle haar het.

Asseblief tog."

Die ambulans arriveer. Hulle stabiliseer Janice en skuif haar versigtig op die draagbaar. 

"Waarheen vat julle haar Meneer?"

"Ons neem haar Dr Harry Surtie Hospitaal toe meneer. As sy medies het sal sy later oorgeplaas word Mediclinic toe."

Larry huil met Lorenzo, wat nou rem in die rigting van die ambulans, nog steeds op sy arm. 

Mense begin in alle rigtings te soek na Lanice. Sy is nêrens te vinde nie. Nie ver daarvandaan nie vloei die Oranjerivier sterk. Van die soekers kyk betekenisvol na die vloeiende watermassa. 

Na die Somerreën in die provinsies hoër op van die rivier is dit redelik vol.

Die polisie arriveer. Sosiale media begin te gons. Larry is deurmekaar. Hy wil by die hospitaal wees waarheen hulle Janice geneem het maar hy moet eers Lanice kry. 

Hy onthou skielik dat hy nog nie Janice se ouers gebel het nie. Hy het ook nie hul nommers nie.

Shane verneem eers later van die skietaanval in Saldanha. Hy was so geskok besig toe hy van Max se ontsnapping verneem het dat na die voorval die vorige dag net huistoe gery het. Hy het gevoel dat hy Suid Afrika gefaal het omdat hy nie die ontsnapping kon verhoed nie.

Hy het later aan die slaap geraak. Toe hy wakker word het hy onmiddelik begin werk aan leidrade. Niks!

Max het soos mis voor die son verdwyn. Hy het ook nog probeer om Selwyn Rooi in die hande te kry. Dié het ook net verdwyn.

Hy was op kantoor op dié dag van liefde toe hy die berig ontvang. Toe hy hoor dat Rachel Adriaanse doodgeskiet was het hy onmiddelik in sy motor gespring en Saldanha toe gery.

In Saldanha aangekom kyk hy eers die sosiale media om te sien of daar enige verdere verwikkelinge is. Hy het geleer dat jy nie net sommer sosiale media moet ignoreer nie.

Hier leer hy van die aanval in Upington maar omdat daar nie name is nie maak hy nie die konneksie nie.

Martin en Sahara is nog steeds by die polisiestasie. Hy lees hul verklarings. 

Martin maak gebruik van die geleentheid om alleen met Shane te praat toe Sahara kleedkamers toe gaan. Hy het 'n geheim ontdek wat hy net met Rachel tot dusver gedeel het in nou is sy nie meer met hom nie. Dit glo dat as hy dit met iemand deel dan is dit net makliker en hy kan dan aangaan met die begrafnisreëlings. 

Shane lyk redelik geskok oor die inligting. Hoe moet hy nou die nuwe verwikkelinge hanteer? Hoe gaan dit sy ondersoek beïnvloed?

Larissa was uit vir die dag met Paul. Sy het eintlik vir hom uitgeneem aangesien hy nie kan sien hoe sy voel nie. Dit was 'n aangename middag op 'n aarbeie plaas naby Stellenbosch. Sy wou hom nie die skrik op die lyf jaag deur hom uit te vra vir aandete nie.

Nou is sy terug in haar woonstel en sy wonder hoe Janice se middag afgeloop het. Hulle het die vorige dag gesels en mekaar vertel van hul Valentyndag planne.

Sy bel. 

"Goeie middag. Janice se foon. Dit is Larry wat praat."

"Goeie middag Larry of sal ek sê G? Waar is Janice?"

"Larissa, ek het nie goeie nuus nie. Sit jy?"

"Vertel net Larry, wat is dit?"

"Janice is in die hospitaal. Sy was vanmiddag geskiet."

"Hoe bedoel jy geskiet."

"Iemand het haar geskiet. Stuur asseblief vir my een van haar ouers se nommers. Hulle weet nog nie."

Larissa is bewerig van skok terwyl sy die nommer soek om vir Larry te stuur.

"Mevrou Louw, dit is Larry hier."

"Naand Larry. Hoekom hou julle die tweeling so laat uit. Bring hulle nou dadelik huistoe. Julle is onverantwoordelik."

"Mevrou, ek het slegte nuus. Janice is in die hospitaal."

"In die hospitaal? Hoekom?"

"Iemand het haar geskiet."

"Nee, nee. Hoe bedoel jy? Watter hospitaal? Is sy ok.?"

"Dr Harry Surtie. Ek weet nie hoe dit gaan nie."

"Ons is oppad. Wag my daar buite."

"Ek is nie daar nie mevrou."

"Hoekom nie. Maak dat jy daar kom."

"Mevrou, ek kan ongelukkig nie. Ek soek vir Lanice. Sy het weggeraak."

"Weggeraak? Jy sê weggeraak! Waar?" 

"Hier langs die rivier mevrou.

Mevrou? Mevrou?"

Dit is doodstil.

©Rooi Mier 17.01.2023

#Stukkendeharte S2 Hfst 11 - Rooi Mier

Sahara is vroegoggend op. Sy is oppad na Rachel toe.

"Ek wil vroeg in die pad val. Antie Jenny is in Upington en om een of ander rede is ek onrustig. 

Wat se besigheid het sy in Upington veral as ek nie daar is nie? Hoekom moes sy so dringend in Upington uitkom dat sy nie eers seker gemaak het of ek daar is nie?"

Sy ry eers na Antie Rachel toe net om haar in te lig sy vetrek sommer direk van Saldanha af Upington toe.

Oral langs die pad is daar mense met ten minste een rooi kledingstuk aan. Die dag van liefde. Dit is nie vir haar beskore nie. Die man wat sy vir ewig gaan liefhê is haar broer.

Daar is 'n diep seer in haar.

Sy parkeer sommer aan die anderkant van die straat want sy moet in elk geval in aanhou ry op dié pad tot sy by die hoofpad kom. Sy ruik die seelug toe sy uitklim.

Voordat sy haar deur toemaak merk sy mense in die voortuin. Dit is Antie Rachel en 'n man wat in 'n vurige omhelsing is. Daar staan twee motors; die een reg voor die huisie wat Antie Rachel huur.

Sy herken dit. Die motor behoort aan haar werkgewer, Martin Adriaanse. 

Sy glimlag.

"Ek het geweet daar is iets tussen die twee. Dit was seker maar die feit dat Antie Rachel nog getroud is met daai Max wat hulle weerhou het van 'n openlike verhouding.

Ek sal maar ry en haar later bel."

"Baie lief."

Rachel gee 'n diep sug. Haar liggaam raak skielik slap.

"En nou Rachel? Rachel! Rachel! Praat met my! Wat gaan nou aan Rachel?"

Haar kop val agteroor. Haar oë is wyd oop en verstar. Martin hou haar basies regop met sy omhelsing.

"Rachel! Rachellll! Nee! Rachel antwoord my."

Martin voel iets taai oor sy hande loop.

Hy hou haar regop met die ander hand en kyk.

Bloed! Rooi en taai warme bloed is op sy hand.

"Help! Help! Iemand help my. Help my asseblief tog!"

Martin skree hard en histeries. Hy hou nou letterlik vir Rachel op. Hy is bang as hy haar neerlê moet hy aanvaar dat sy leweloos is. Solank sy nie lê nie is daar nog hoop. 

"Sy moet net lewe. Sy het nie 'n keuse nie want sy moet skei sodat ons kan trou.

Kom nou Rachel! Moenie nou speletjies speel nie. Ons gaan dan môre 'n prokureur sien.

Asseblief my engel. Dit is Valentynsdag, nie 'n dag om dood te speel nie.

Heeeelp! Heeeeelp! Iemand help tog!"

Sahara wou net terug in die motor klim toe sy dié hulpkreet hoor. Sy kyk na waar Oom John Antie Rachel se slap liggaam regop hou. Daar is bloed.

Sy hardloop na hulle toe verby die motor wat daar staan. Dit registreer nie eers by haar dat die bestuurder nog steeds agter die wiel sit nie. Sy sien hom net so skrams en haar brein vra hoekom hy glimlag terwyl sy die hekkie voor oopruk.

Max draal die knaldemper stadig van sy vuurwapen af terwyl sy oë vasgenael op die paartjie is.

"Ai tog my Racheltjie. Hoekom moes julle my verraai? Nie net by die gereg nie maar ook in liefde. 

Het julle dan geen skaamte nie? My broer en my vrou.

Nou is jy dood. Verewig weg en jy kon dit verhoed het. Ek het hierheen gekom in die hoop dat ons kon gesels en vind jou in my broer se arms."

Hy merk die pragtige jong dame op wat na die hek toe hardloop. Dit lyk nie of sy hom gesien het nie.

'n Glimlag begin nou om sy mondhoeke vorm. 

"Nou gaan jy lei my broer totdat ek voel om jou uit jou ellende te red. Die dood sal jy as genadig beskou.

Nou moet ek in Upington kom. Dit is tyd om my dogter te ontmoet. 

"Valentynsdag! My Valentynsdag is rooi; rooi met die bloed van my geliefde."

Martin en Sahara sit plat op die gras en wag vir 'n ambulans. Hulle albei weet dat dit eintlik onnodig is. Daar word nie 'n woord tussen hulle geuiter nie. Hulle sit net daar.

Skielik vlieg Martin op en begin op en af te loop.

"Max Meneer M Adriaanse, jy het vandag jou doodsvonnis geteken"

In Upington is Larry oppad met sy gehuurde Mercedes om sy beminde te gaan optel. Vandag gaan hy sy liefde bewys deur met die tweeling 'n band te begin bou. Hy het hulle al ontmoet maar dit was elke keer net vlugtig.

Janice lyk pragtig in haar rooi en wit kortbroekpakkie. Sy voel opgewonde dat Larry haar kinders in ag neem. Dit beteken hy beskou hul verhouding as ernstig.

Lanice het 'n pop in haar een hand en hou haar Mammie se hand vas. Lorenzo het karretjies in albei hande. Hy loop skuins voor sy Mammie.

Larry maak die deure oop en help die kinders agter in. Hy maak hulle veiligheidsgordels vas.

Daarna maak hy die linkervoordeur oop vir Janice en gee 'n diep buiging. 

"Tot u diens, my koningin."

Janice glimlag.

"Moenie laf wees nie man."

Upington is nog redelik warm so hulle soek na 'n plek onder 'n boom.

Larry haal 'n mandjie en komberse uit.

"Janice, ek gaan vandag die tweeling bederf. Lorenzo gaan my help om die koningin en die prinsessie te bedien."

Hy haal 'n pienk roos uit waarvan die dorings van die stingel verwyder is en vra vir Lorenzo om dit vir Lanice te gee.

Hy self gee vir Janice 'n pragtige rooi roos. Dit lyk of Lorenzo die hele bedienery geniet, solank hy ook kry van die lekkernye. Larry moet net keer anders bedien hy die sjokolades voor die soutigheid.

Dit is 'n heerlike namiddag. Lorenzo raak eerste aan die slaap op die kombers. Sy motors het hy eers netjies langs sy ma se sak gepak.

Lanice raak 'n rukkie later aan die slaap met haar kop op Larry se been. Hy skuif versigtig en plaas 'n kussing onder haar kop.

As jy egter gedink het hy is verlos is dit 'n fout want Janice lê nou met haar kop op sy been.

Hulle is albei ontspanne en vir iemand wat kyk lyk hulle soos 'n getroude paartjie.

"Waar is jy?"

"Ek is op my pos met my teiken onder waarneming."

"Moenie my bel nie want ek gooi dié foon en sim nou weg. Wanneer ek jou weer bel moet jy vir my sê dat G nie meer is nie.

Ek kontak jou later. Nou moet ek net eers wegkom uit Saldanha. Sal môre daar wees."

Teen 16:30 pak Larry hulle op. Hulle is almal uitgeput. Die tweeling is wakker. Larry neem hulle motor toe terwyl Janice die komberse opvou. 

Larry is terug by Janice en buk om die vullissak op te tel toe Janice skielik skree. Sy hou haar maag vas en val.

Larry hoor die skoot weergalm terwyl hy in 'n gebukkende posisie is. Hy kom vinnig regop en sien Janice hou haar maag vas voordat sy grond toe sak.

Larry is buite homself. Hy het lank genoeg vir Candice gewerk om te weet dit was bedoel vir hom.

Die lang arm van Meneer M se reg het hom uiteindelik ingehaal. Hy gaan lê bo-oor Janice om haar te beskerm teen enige verdere skote.

Niks. Hy hoor net 'n voertuig met skreeuende bande wegtrek.

©Rooi Mier 17.01.2023

#Stukkendeharte S2 Hfst 10 - Rooi Mier

Skielik bars die hel los. Daar is 'n harde slag en skreeuende bande, gevolg deur wat klink soos 'n botsing. 

Die bestuurder van die voertuig waarin Max is sien hoe die begeleidingsvoertuig agter hom skielik van die pad afswaai en teen een van die pilare van die brug bots. Die voertuig agter kom skreeuend tot stilstand maar kan nie 'n botsing vermy nie.

Skielik is daar net vlamme agter hulle. In die truspieël kan hy nie uitmaak watter voertuig brand nie. 

Die verkeerslig na die brug is groen dus ry die voorste voertuie oor. Dit is duidelik dat albei versnel het. 'n Bakkie aan die linkerkant van die kruising ry vinnig vorentoe oor die verkeerslig wat vir hom rooi is en stamp albei begeleidingsvoertuie van die kant af; een aan die agter- en een aan die voorkant. Dit veroorsaak dat albei voertuie aan die verkeerde kant van die pad beland. Dit veroorsaak dat voertuie in die teenoorgestelde rigting in hulle vasry.

Die hoofvoertuig swenk skerp na links en ry in die voertuie vas wat wag vir die verkeerslig. Mense skree en dié van hulle wat nie in die ongeluk betrokke is nie spring uit hul voertuie.

Die paniek veroorsaak chaos, soveel so dat niemand opmerk dat Max ongeboei en sonder kettings agteruit die hoofvoertuig klim, stap na 'n wagtende voertuig en die voertuig wegjaag nie. 

Teen die tyd dat een van die voorste voertuie se bewaarders hom byval hulle het 'n gevaarlike gevangene is die gevangene, soos in mond van Kapenaars, wit weg. Die bewaarder wat saam met hom agter in die voertuig was lê oënskynlik bewusteloos. Hy begin stadig 'bykom'.

Die polisiestasie waar Selwyn die klagtes lê is skielik in rep en roer. 

Iemand skree, "Meneer M het ontsnap!"

Selwyn hoor dit en verlaat die polisiestasie vinnig. Hy probeer om ongemerk weg te kom sodat Shane hom nie kan sien nie. 

Net voordat hy egter om 'n hoek kan verdwyn sien Shane hom. Skote begin klap skielik. Selwyn val. Shane wat besig was om uit te klim duik instinktief langs die motor neer. 

Dit is ook net betyds want skielik hoor hy hoe skote sy motor tref. Hy rol na die motor langsaan en hardloop gebukkend na die agterkant, wapen in die hand.

Binne die polisiestasie lê Selwyn se regsverteenwoordiger beangs op die vloer. Die Sersant neem die verklarings, vou dit en druk dit in sy broeksak. 

In die chaos binne die polisiestasie is hy die enigste een wat nie geskok is oor die gebeure nie. Hy kyk na die prokureur en grinnik.

"Bang gat."

Hy is seker dat die prokureur nie gesien het hy die klagstaat in sy sak gedruk het nie. 

"Manne, hoekom is julle so stadig? Ons moet daai aanvallers kry!"

Buite trek voertuie met skreeuende bande weg. Die aanvallers het ontsnap.

Shane skiet 'n skoot of twee agterna maar hy besef dat hy dalk iemand onskuldig kan tref. Hy onthou van Selwyn en hardloop daarheen.

Daar is niemand, net 'n paar bloedspatsels. 

"Hande in die lug."

Shane skrik, steek sy hande albei in die lug.

"Draai stadig om."

Die adrenalien pomp. Hy draai stadig om maar is gereed vir enigiets.

""Shane! Is dit jy? Amper skiet ek jou."

"Betram, waar val jy uit. Jy is te stadig om my te kan raakskiet maat.

Wat maak jy in die Kaap?"

"Verplaas hierheen. Ek het nou net op die aksie afgekom; gedink jy is een van die skurke."

Die tv en radiostasies begin te gons. Martin sit geskok in sy kantoor en luister. 

Teen die aand is Max nog steeds op vrye voet. Omtrent die helfte van elke nuusberig oor die land op alle media gaan oor die ontsnapping. Sosiale media gons.

Martin is oppad Saldanha toe. Rachel kan in gevaar wees alhoewel sy weier om deur sekuriteit opgepas te word.

Daardie aand slaap almal wat al een of ander tyd met Max te doen gehad het onrustig.

Die oggend is Max nog steeds die hoofnuus. Jy kan egter sien dit is nie net 'n gewone dag nie want die meerderheid nuuslesers het vanoggend rooi en wit aan. Dit is dié dag van liefde. 

"Valentynsdag! Ek wonder wat maak jy vandag my liefde. Jou liefde sal vir ewig in my hart brand al kan ek nie saam met jou wees nie.

Dit is jou skuld. Alles jou skuld dat ons nie op die dag van liefde saam kan wees nie. Ek het jou baie lief Rachel maar jy het my verraai. Daarvoor kan ek jou nie laat lewe nie. Ongelukkig moet jy sterf. Jy sal 'n stuk van my hart saamneem.

Max, jy sal moet opstaan. Vir nou moet jy aan die beweeg bly."

Larry onderdruk die beklemming op sy bors. 

"Dié man kon gerus 'n beter tyd gekies het om te ontsnap. Hoekom juis nou? Ek gaan nie toelaat dat Max my dag bederf nie. Vandag gaan ek vir Janice wys hoe lief ek haar het."

Hy bel haar.

"Janice, goeie môre, ek wil jou iets vra."

"Goeie môre Larry. Het jy die nuus gesien?"

"Ja, ek het. Gaan jy toelaat dat dit ons dag bederf?"

"Nee. Wat wou jy vra?"

"Ek het vir ons 'n plekkie bespreek vir aandete. Die ding is, ek wil dit kanselleer en liewer jou en die kinders op 'n piekniek uitneem vanmiddag?"

"Is jy seker dit is wat jy wil doen? Ek sal nogal daarvan hou dat ons vier die dag saam vier. Dit is jou kans om die tweeling beter te leer ken."

"Dan maak ons so."

"Jy vergeet dat ek werk maar gelukkig werk ek nie vandag nie."

"Dankie Vader. Ek het vergeet. Sien jou om 13:00?"

"Reg so Larry."

Martin is van vroeg af al besig. Hy het in 'n B & B geslaap en is nou besig buite die huisie wat Rachel huur. Toe alles afgehandel is en die mense vertrek het wat hom gehelp het, skakel hy haar.

"Goeie môre Martin, wat is jy so vroeg op my spoor?"

"Gelukkig weet ek jy slaap nie vas nie.

"Kan ek jou terugbel? Daar is iemand by die deur."

"Reg so, praat later."

Rachel stap na die deur toe en maak oop. Tussen die deur en die veiligheidshek lê 'n bossie van die pragtigste rose, duidelik gekweek deur iemand met die nodige kennis. Dit is pienk met rooi spikkels.

Sy tel dit op ek kyk maar daar is niemand. Daar is 'n nota by.

"Dit is net die helfte van my hart. As jy die ander helfte wil hê moet jy uitkom."

Sy sluit die veiligheidshekkie oop en stap uit. In die hoekie van die die voortuin is daar 'n rooi gazebo. Daar is 'n tafel met bakke op en die tafel is gedek.

Soos sy nader stap sien sy aarbeie en waatlemoenstukkies in bakke.

Daar is ook vonkel druiwesap. Daar is egter niemand te sien nie. Musiek begin te speel.

Rachel weet die persoon kruip iewers weg. Sy is aangenaam verras want sy weet dit kan net Martin wees. 

"Uiteindelik is ek gereed om te erken dat ek hom ook lief het."

"Your once, twice, three times a lady

And I love you.

Yes your once, twice, three times a lady

And I love you."

Dit is beslis nie Lionel Richie se stem nie. 

Hy kom om die hoek terwyl hy sing met 'n mikrofoon in die regterhand en 'n enkele rooi roos in die ander. Martin het 'n ongelooflike stem.

"Rachel, jou teenwoordigheid laat die bloed in my are bruis soos vonkelwyn." 

Hy neem twee glassies en skink.

"Weet jy dat ek leeg voel sonder jou. Ons twee hoort saam soos aarbeie en room."

Hy neem 'n aarbei, doop dit in room en laat haar daaraan byt.

"Ek het jou oneindig baie lief Rachel. Is daar plek vir my in jou hart?"

"Ja Martin. Hope plek. Ek het jou ook lief."

Hy trek haar nader en soen haar lank en innig.

©Rooi Mier 17.01.2023

#Stukkendeharte S2 Hfst 09 - Rooi Mier

"Larry, wil jy nie later 'n draai kom maak nie, asseblief."

Larry luister na die whatsapp boodskap en sy hart bokspring. Hy was seker dat Janice nooit weer van haar sal laat hoor nie. Sy sal tog nie vir hom 'n boodskap stuur om net te sê dit is oor nie.

"Gewone tyd, gewone plek of vanaand?"

"Kanselleer dit eerder Larry, ek is nie reg vanaand nie."

Larry se hart sak tot in sy skoene. So sy wil my sê dit is klaar tussen ons maar nou het sy nie die moed nie. 

"Ek sal haar die moeite spaar."

Hy begin om vir haar 'n boodskap op te neem toe hy sien sy is besig om een te skryf.

"So, dit is makliker vir haar om dit te skryf as om dit te sê. Laat ek maar wag dan sal ek net antwoord."

Die boodskap kom deur en hy lees dit.

"Die rede hoekom ek sê jy kan nie vanaand kom nie is omdat jy nie vanaand 'n valentynspresent sal hê nie. Sien jou môreaand en kry tog asseblief iewers 'n motor."

Larry is so opgewonde hy tik net dankie en begin dadelik te google. Hopelik is daar nog plek by daai restaurant wat spesiale valentynsetes aanbied. Hy onthou dan dat hy nooit sy oorspronklike bespreking gekanselleer het nie.

Nou moet hy nog net 'n motor huur. Daar is gelukkig nog een Mercedes beskikbaar vir Valentynsdag. Hy kan dit eers 14:00  op Valentynsdag kry. Dit pas hom. Hy is nie een vir uithang nie maar terwille van Janice sal hy darem iets ordentliks moet gaan koop om aan te trek.

Max maak hom gereed om na sy verhoor te vertrek by die Kaapstadse Hooggeregshof. Vandag is die dag. Dit is die eerste keer in 'n lang tyd dat hy skoenlappers in die maag voel. Hy is werklik opgewonde.

Rachel is uitgeput. Sy het 'n besige naweek gehad. Sy is geestelik en liggaamlik uitgeput. Sy het eindelik gisteraand, dit is nou Sondagaand, vir Martin vertel wat sy in Saldanha kom doen het. 

Hy wou natuurlik met alle mag onmiddelik deurkom maar sy het hom gestop. Sy wil net vir so twee dae rus.

Sy skakel vir Shane. Hy het gister vir Selwyn Rooi kom haal hier in Saldanha. Vandag gaan Selwyn, as die hof dit gaan toelaat, 'n erkentenis by die polisiestasie gaan indien dat hy, Max en Willem destyds saam betrokke was by diamandsmokkelary en  ook 'n klag indien teen Max van moord op iemand wat hulle destyds wou dwarsboom. Max het persoonlik die sneller getrek asook vir hom, Selwyn met die dood gedreig as hy enigsins in die vorige verhoor sou getuig. As hulle hul kaarte regspeel kan Max sommer onmiddelik weer gearresteer word na die hofsaak. 

Shane hoop regtig dat alles goed gaan afloop. Hulle gaan juis die klag lê by 'n polisiestasie naby die hof sodat die polisie onmiddelik kan reageer nadat die klag gelê is. Max se hoop moet sommer onmiddelik gesmoor word indien hy enige hoop sou hê dat sy appél sou slaag. 

Selwyn is senuweeagtig. 

"Wat gebeur as iets skeefloop? Ek is nie meer so seker dat dié plan van Shane gaan werk nie. As dit skeefloop is hy nog meer in die spervuur.

Wat is die alternatief? 'n Lewe van heeltyd oor jou skouer kyk? Al sou ek nie help om dié plan deur te voer nie sal ek tog nooit vry wees solank Max lewe nie.

Miskien moet ek Max laat doodmaak?"

Hy besluit egter onmiddelik daarteen. Dit is hoekom hy destyds hom moes uitkoop uit die diamandsindikaat. Moord is nie in sy dna nie. Miskien sal hy eendag dalk uit selfverdediging iemand moet doodmaak maar hy hoop dat dit nooit nodig sal wees nie.

"Goeie môre Antie Jenny. Hoe gaan dit? Ek sien jy soek my."

"Goeie môre Sahara. Ek is gesond. Waar in die wêreld bevind jy jou? Ek het nou net hier in Upington aangekom."

"Wat maak jy daar? As jy my vooraf gewaarsku het sou ek jou kon vertel dat ek nie daar is nie."

"Wel, ek is nou hier. Daar is iets wat ek dringend hier moet kom doen. Mag ek maar by jou huis tuisgaan?"

"Wat makeer jy Antie? Jy weet mos jy kan enige tyd daar kom bly. Kry die sleutels by Antie Sandra langsaan."

"Jy het my nog nie geantwoord nie, waar is jy?"

Ek sal Antie sê slegs as jy niemand sê waar ek is nie."

"Ek belowe."

"Dit was darem vinnig. Onthou vir niemand nie asseblief, nie eers my pa nie. Ek is in Saldanha. Antie, ek het inspirasie nodig."

"Geniet dit dan maar en raak geïnspireerd. Totsiens."

Max klim agter in die trok waarin gevangenis wat hof toe moet gaan gewoonlik ry. Sy hande is geboei en daar is 'n ketting aan sy bene. Hy lyk baie vrolik vir iemand wat nog in die hof moet verskyn.

"So jy lê 'n klag van diamandsmokkelary en moord teen Max Adriaanse, dié Max ook bekend as Meneer M? 

Weet jy hoe gevaarlik die man is?"

"Niemand ken hom beter as ek nie Sersant en ja, ek lê die klagtes teen hom."

"Het jy mooi dié saak oordink Meneer Rooi? Is u seker? Jy is besig om jouself in die voet te skiet."

"Sersant, doen jy net jou werk. Die meneer is besig om 'n klag te lê en jy is veronderstel om die klag af te neem. 

Meneer Rooi, ek is Stanton Fillis, jou prokureur. Jammer dat ek bietjie laat is. Ek verstaan jy was reeds ingelig oor wat jy moet sê?"

"Ja Meneer Fillis, die speurder het my alles gesê wat van u af kom."

"Sersant, ek is dan hier om Meneer Rooi te verteenwoordig. My kliënt sal nie hier by 'n toonbank waar die publiek is en alles hoor sy verklaring aflê nie. Kry vir ons 'n kantoor of kamer."

Max glimlag. 

"Julle is darem bang vir my bewaardertjie. Jy sit hier vasgevang met my agter in 'n voertuig en ek kan sien hoe senuweeagtig jy is. 

Dan is julle eskortvoertuie darem baie; dink julle vier is genoeg?"

Hy grinnik. 

"Moenie bekommerd wees nie, ek sal soet wees vir so lank ek kan. My vryheid lê en wag vir my."

Max knipoog vir die bewaarder wat senuweeagtig rond kyk asof hy iets verwag. 

Die bewaarder gee 'n kopknik terwyl hulle onder deur 'n brug ry.

Skielik bars die hel los. Daar is 'n harde slag en skreeuende bande, gevolg deur wat klink soos 'n botsing.

©Rooi Mier 17.01.2023