#Stukkendeharte Hoofstuk 57 - Rooi Mier

Rondom Lily Straat in Reiger Park is dit skielik baie bedrywig. Eers het dit gelyk of daar skielik net maar verkeer van gewone voertuie in die area is. Geleidelik verander dit ook na meer SAPD voertuie. Daar is verskillende uitgange uit die straat. Die uitgange word afgebaken.

Die mense in die area merk dit en begin mekaar oor en weer bel. By sommige huise begin mense oor die hekke en mure hang om te kyk wat volgende gaan gebeur. Sommige mense sluit hulself in en loer deur die vensters

By sommige huise is mense skielik baie bedrywig. Dalk het hulle iets om weg te steek. 

Sarie wonder hoekom Steven met haar wil praat. Sy het geweet een of andertyd sal hulle moet gesels, dit is net dat sy nie lus is vir nog slegte nuus nie. Hulle is ook die enigste oorblywende familie van Willem. Sodra die ondersoek afgehandel is moet hy ook nog begrawe word.

Dit op sigself is klaar moeilik. Hoe begrawe jy iemand wat indirek die dood van jou kind veroorsaak het? Wat soveel hartseer in jou gesin veroorsaak het? 

Sy weet egter instinktief dat dit nie is waaroor Steven wil praat nie.  Hy wil natuurlik skei. Sy sal maar net met alles saamstem; sy het dit immers veroorsaak.

Sy sit en wag reeds vir hom. Hy neem op 'n bank teenoor haar plaas. Sy gaan hom voorspring dink sy. 

"Steven, my man, ek wil jou weereens om verskoning vra vir wat ek gedoen het. Ek wil net vir jou sê dat ek aanvaar dat jy nie meer my man wil wees nie. Dit is nie maklik vir my nie maar ek gaan jou nie teenstaan nie."

"Waarvan praat jy Sarie?"

"Ek sê jy kan maar 'n prokureur kry om die skei te hanteer."

"Wie het van skei gepraat? Wil jy skei Sarie?"

"Natuurlik nie. Ek gaan jou nie teenstaan nie."

"Stadig Sarie. Ek het iets anders op die hart. Luister asseblief.

Ek wil jou vertel van my verlede, van alles wat ek deurgemaak het voordat ek jou ontmoet het. Belowe my jy sal eers net luister."

Hy begin vertel van sy kinderdae en alles wat hy deurgemaak het. Alhoewel Sarie 'n gedeelte daarvan gehoor het in die lykshuis, luister sy aandagtig sonder 'n woord.

Dit laat haar opnuut hartseer. Sy hoor die seer in sy stem en dit herinner haar aan klein Sally. Hoe seer moes dit vir haar gewees het, haar eie moeder wat haar wegstuur.

Sy is nie eers bewus daarvan dat haar trane loop nie. Steven se oë is ook nat. 

Nadat hy klaar sy storie vertel het kom staan hy voor haar waar sy sit.

"Sarie, ek wil vra dat jy my vergewe. Vergewe my dat ek nooit my geheim met jou gedeel het nie. Vergewe my dat ek my na drank gewend het. Vergewe my dat ek jou nie die lewe gegee het wat jy verdien het nie; dat ek deur my lewe jou gedwing het om in Willem se mag vasgevang te word. Ek wil jou ook vra om my te vergewe vir die manier waarop ek opgetree het die laaste paar weke.

As jy nie kan nie sal ek jou nie verkwalik nie. Ek het besef dat ek jou nog baie lief het en dat dit nie sommer net weggewens kan word nie."

Nadat hy klaar gepraat het staan Sarie op, plaas haar arms om sy nek en gee hom 'n liefdevolle, lang soen.

"As daar iemand is wat om vergifnis moet pleit dan moet dit ek wees Steven. Kan jy mý vergewe. Natuurlik is jy vergewe."

Steven hou haar net styf vas en sê nie 'n woord nie. Sy liggaam ruk net.

Hulle het nie eers opgemerk dat Mavis alles gehoor het nie. Sy is haastig oppad, maar gee haar krediet. Sy versprei 'n positiewe storie van vergifnis dié keer. Niemand het gesien dat sy trane afvee toe sy daar wegstap nie.

Het Mavis ook dalk 'n seer wat sy verdoesel agter baie praat en skinder? Is dit nie dalk haar manier om aanvaarding te soek nie? 

Nadat die polisie alle in en uitgange by Lily Straat afgebaken het, ry 'n paar tot by 'n huis in die straat waar hulle vinnig uitspring met wapens gereed.  Die straat kry skielik lewe. 

Die polisiemanne spring oor die hek en mure. Van hulle hardloop om die huis om die agterdeur en alle vensters te dek. Mense val oormekaar om in 'n posisie te kom om 'n foto of video te neem van die gebeure. Niemand weet egter wat presies aangaan nie.

Ja wat, ons mense sal die gevaar in hardloop uit nuuskierigheid. 

Drie polisiebeamptes mik na die voordeur toe. Een klop met 'n dokument in die hand (natuurlik 'n lasbrief), terwyl die ander twee hom dek, gereed om hom te beskerm.

Dit vat 'n rukkie vir die deur om oop te gaan. 'n Vrou van om en by veertig verskyn in die deur. Dit is duidelik dat sy heftig reageer. Die polisiebeampte wys haar die dokument. Sy neem haar tyd om dit te bestudeer terwyl mens duidelik kan sien dat die beamptes ongeduldig is. Probeer sy tyd wen?

Sy staan uiteindelik weg en die polisie beamptes storm die huis binne. 

Buite het iemand genoem dat hy gehoor het Meneer M skuil daar binne. Nou is dit in rep en roer. Polisie beamptes sukkel om die mense weg te hou. Elkeen wil die oomblikke vasvang in beeld of ten minste as 'n ooggetuie. Totale chaos daarbuite. Nog drie polisie beamptes gaan die huis binne. 'n Vroue beampte lei die vrou wat die deur oopgemaak het uit. Sy vloek en skel op die beampte. Dit is duidelik dat die beamptes binne die huis nie behoorlik hul werk kan doen nie. 

In Kaapstad sit Shane gespanne. Hy spring dan weer op en loop op en af, op en af. Sy oë vasgenael op die horlosie op sy arm, dan die horlosie op sy kantoormuur.  Wat neem dit so lank. Hoe wens hy hy was self daar. Die spanning loop hoog. Sy selfoon lui. 

Dit is nie sy amptelike sel nie. Hy ruk dit uit sy sak en gooi dit teen die muur. Shane kan dit nie verdra om nie deel van die operasie te wees nie.

Dit is asof hy musiek hoor en iemand druk hom vas sodat hy nie kan dans nie. 

In Reiger Park is die spanning ook op breekpunt. Die eerste joernalis het daar aangekom. Nuus oor die moontlike arrestasie van Meneer M is besig om soos 'n veldbrand te versprei. In nuushuise word daar oormekaar geval en geskree soos elke joernalis die een wil wees wat die storie gaan dek vir sy of haar nuushuis.

Binne die huis is alles deurmekaar. Meubels is geskuif, kaste is oop. Daar is selfs 'n gat in die plaffon. Is daar nie dalk iewers 'n geheime deur nie, 'n ondergrondse kamer nie.

Niks, hier is niemand anders in die huis nie. Die beamptes kom een vir een uit. Daar is 'n verslae uitdrukking op elke gesig wat uitkom. Elkeen van hulle wou so graag deel wees van dié groot vangs. Daar is egter geen vis nie.

Shane is net so verslae toe hy die nuus kry. Intelligensie het bevestig dat Max Adriaanse in die huis was maar nou is hy nie daar nie. Hy gaan sit en staar na die muur oorkant hom.

'n Halfuur gelede het Meneer M se foon gelui. Die persoon het hom gewaarsku dat hulle oppad is om hom vas te kom trek. Max was kalm toe hy die beampte bedank. 

Verder af in die straat staan 'n ouman en kyk oor die hek na die bedrywighede. Hy is grys en leun op sy kierie. Sy hoed is effens oor sy gesig getrek. Hy glimlag breed en loop hinkepink die huis in.

***

©Rooi Mier 13.07.2022

#Stukkendeharte Hoofstuk 56 - Rooi Mier

Shane is opgewonde. Hy het inligting ontvang waar Max Adriaanse hom bevind op die oomblik. Terselfdertyd voel hy ook teleurgesteld. Dit is in Reiger Park in Johannesburg en hy is in Kaapstad. 

Die volgende vlug na Oliver Tambo is eers oor ses ure, dan is die vlug self ten minste 2 ure. Saam met die voorbereiding kan dit dus tot tien, elf ure neem. Dit is hopeloos te lank.

Dit beteken hy moet 'n span daar vra om die operasie uit te voer. Dit sit nie lekker aan hom nie. Daar is altyd die risiko dat daar inligting kan uitlek oor die beplande operasie.

Hy het egter nie 'n keuse nie. 

G of te wel Gavin het vroeër uiteindelik met sy ma gepraat op video oproep. Sy het vertel dat 'n baie gawe polisieman by hul huis aangekom het en haar ingelig het oor waarmee hy besig is. 

Natuurlik was sy baie teleurgesteld om te verneem haar seun is betrokke met mensehandel. Dit het haar vreeslik ontstel. Sy het hom ook sommer lekker vasgevat.

Daarna het sy weer haar blydskap uitgespreek dat hy tot sy sinne gekom het en nie die arme kind in haar ellende gelos het ter wille van haar nie.

Voor dit alles gebeur het, het Gavin 'n baie openlike verhouding met sy ma gehad. Hy vertel haar dus van Yvonne. Sy ma moedig hom aan om sy hart te volg maar sy waarsku hom hoe gevaarlik dit kan wees. Sy kom egter tot die slotsom dat 'n mens alles behoort te doen vir liefde, natuurlik alles wat wettig is.

Na sy gesprek met sy ma kon hy Yvonne kontak. Sy lyk goed. Nadat sy hom bedank het vertel sy hoe spyt sy is dat sy nie ag geslaan het op Larisa se waarskuwing nie. Al wat sy nou wil doen is om haar graad te voltooi. Sy wil 'n maatskaplike werkster word.

Gavin vra vergifnis oor sy aandeel aan haar ontvoering. Hy vertel haar van sy ma en hoekom hy dit gedoen het.

Yvonne weet egter alreeds dat hy sy ma wou beskerm en vertel hom dat sy dalk presies dieselfde sou gedoen het as sy in dié posisie was. 

Gavin is so dankbaar dat sy dit nie teen hom gaan hou nie. Hoe sou hy dit kon verdra? Hy voel dan alreeds so skuldig. Sal dit nou die regte tyd wees om haar te vra of hy haar weer kan sien? Hy besluit om liewer te vra of hulle in kontak kan bly waarop sy antwoord dat sy hom graag beter wil leer ken en dat sy vriende met hom wil wees.

Dit gee hom natuurlik baie hoop. Die moontlikhede is nou baie groter. Nadat hulle totsiens gesê het fluit hy 'n opgewekte deuntjie. Gaan sy dalk die moeder van sy kinders wees? 

Hy wonder juis watter tipe pa hy gaan wees nadat hy gehoor het dat Meneer M eintlik Candice se pa was en dat hy moontlik verantwoordelik is vir die moord op haar.

Intussen staan sy lewe stil. Stan Cupido praat juis van 'n nuwe naam en van totdat die verhoor plaasvind. Dit kan jare neem.

Candice Williams se ma het klaar begrafnisreëlings getref. Haar dogter her as 'n krimineel sterf. Sy het altyd gesê dat Candice baie soos haar pa was. Sy het gehou van mag. Nou het dit haar lewe gekos.

Die ironie is dat haar kriminele aktiwiteite nie direk haar dood gekos het nie maar haar eie pa. Sy glo dat dit hy was. 

As jong meisie was dit so bekorend om die meisie te wees van iemand groot in die onderwêreld. Die droom van baie jong meisies. Sy het 'n lewe van luukse gehad solank sy net beskikbaar was vir hom.

Daar was 'n tydperk dat sy selfs gunsies aan 'n vriend van hom moes doen. Sy het geglo dat sy baie belangrik vir hom is want sy het aan niks tekort gehad nie. Sy was selfs 'n keer saam met hom Dubai toe as Mev Max Grant, die van wat sy gedink het sy eie is.

Hoe groot was die ontnugtering toe sy swanger word en gedink het hy gaan met haar trou. Sy moes met 'n skok uitvind dat hy reeds getroud is en dat hy nie eers eenkeer daaraan gedink het om ernstig met haar te wees nie.

Dan sal hy ook eers wil vasstel of dit wel sy kind is want hy het daar dan aan sy vriende aangebied as vermaak. Dit kan mos enige iemand se kind wees.  Wat haar die seerste gemaak het was toe hy gesê het sy moet aanvaar dat sy niks meer as 'n prostituut is. Hy koop haar dienste.

Sy was platgeslaan. Kan dit wees dat sy, 'n intelligente persoon in dieselfde strik getrap het as baie ander jongmeisies?

Sy het uit sy lewe verdwyn maar hy het haar tog opgespoor keer op keer dan het sy maar wees saam met hom geslaap. 

Nadat sy die wonderlikste man ontmoet het en met hom getrou het, het hy nog steeds sy draai kom maak. Haar man het skielik sy werk verloor en net so skielik 'n ander werksaanbod gekry. 

Sy het uitgevind dat dit Max se toedoen was. Wanneer hy wou kom oorslaap moes haar man elke keer uitstedig gaan. Hy het natuurlik nie geweet dat sy eintlike baas sy stiefkind se pa was nie.

Nou haat sy hom. Hy het haar kind vermoor. Sy is oortuig daarvan dat sy hom self sal vermoor as sy kon. 

Sy het nou in die nuus gelees dat sy vrou Rachel is en dat sy gedink het hy is jare dood. Arme vrou of was sy ook bekoor deur sy mag?

Steven het die saak oordink. Hy wil so graag vir Sarie vergewe maar het dié geld nou 'n probleem geword. Sy ly tog klaar, gaan verdere straf nodig wees? Dit is maklik vir hom om te sê sy het ons kind se dood veroorsaak.

Waar was hy as pa? Hy het agter die seer van die verlede geskuil en homself bejammer. Het dit enigsins gehelp? Hy het nou liewer dubbele seer. 

Moes hy nie liewer sy seer gebruik het om andere die seer te spaar of meskien daardeur te help nie?

As hy gepraat het, sou iemand anders nie dalk ook die moed gehad het om te praat nie. Dalk sou dit die steriotipering help wegneem het. Dalk sou Sarie miskien anders reageer het toe Sally kom praat het.

Dit is so maklik om die blaam op iemand anders te lê om jouself beter te laat voel.

Is hy nog lief vir Sarie? Ja, beslis. Hoekom sy eie hart en daarmee ook haar hart vernietig? Is daar dan nie genoeg stukkende harte in die wêreld nie?

Steven maak 'n keuse. Hy kies om die verandering te wees. Verandering begin vandag in Kokerboom Straat in Vanwyksvlei. 

Vir die eerste keer in jare is hy op sy knieë.

"Ag Here, ek weet nie meer hoe om te bid nie daarom val ek sommer met die deur in die huis.

Almal sê U weet alles. So U weet van my seer. Ek het vir jare ander mense gehaat en selfs vir U. Vandag moet U my vergewe.

My haat het niks van hulle weggeneem nie. Dit het my liewer na drank gedryf. Ek weet ook wat selfhaat is. Hoe meer ek gedrink het hoe meer het ek myself verag.

Leer my om ander te vergewe dan kan ek myself vergewe omdat ek glo dat ek dan vry sal wees.

Amen."

Vir die eerste keer nadat Sally gesterf het sien Steven lig in die tonnel. Hoekom het hy skuldig gevoel as hy die slagoffer was? Het hy dan die daad gepleeg dat hy skaam moes voel? Hy moet begin deur eerstens vir Sarie alles te vertel.

***

Psalm 103:10 Hy handel met ons nie na ons sondes en vergeld ons nie na ons ongeregtighede nie.

11 Want so hoog as die hemel is bo die aarde, so geweldig is sy goedertierenheid oor *die wat Hom vrees.

12 So ver as die ooste verwyderd is van die weste, so ver verwyder Hy ons oortredinge van ons.

©Rooi Mier 13.07.2022

#Stukkendeharte Hoofstuk 55 - Rooi Mier

Sahara het toe nie teruggebel nie. Paul is nou nie seker of sy sy nommer herken het en toe besluit het om nie te bel nie of is sy nommer net eenvoudig nie gelys nie. Hy is egter nie van plan om so maklik tou op te gooi nie. 

Paul skakel weer. Die foon hou aan lui totdat dit hom later aanspoor om 'n stempos te los. Hy druk egter af. 

Yvonne het gevra dat hy Larisa laat weet dat haar wond mooi heel. 

Hy skakel Larisa.

"Larisa goeie middag."

"Hi Larisa, klink jy altyd so formeel. Dit is Paul, Yvonne se broer."

"Hi Paul, ek wou maar net nie voorbarig klink nie. Jy het so saaklik geklink toe ek laas met jou gepraat het."

"Dit was seker as gevolg van my bekommernis oor Yvonne. Hoe gaan dit met die eksamens?"

"Baie studeer werk maar oor die algemeen gaan dit goed. Hoe gaan dit met Yvonne. Haar nommer werk nie meer nie."

"Sy het my juis gevra om jou te laat weet sy is op die herstel pad. Dit was net moeilik om weer vaste kosse te begin eet. Sy lyk glo nou soos Amerika se maer modelle, vel en been."

Larisa lag.

"Ek wens ek kan 'n kilo of twee verloor."

"Nee man Larisa. Jy wil tog nie dat die mense jou moet mis kyk nie. Jy is perfek soos jy is.

Ek wil jou eendag uit neem vir ete. Dit is net om dankie te sê vir jou bydrae tot Yvonne se redding. My ma kan nie ophou om te sê hoe dankbaar sy is teenoor elkeen met 'n bydrae.

Wat doen jy die Saterdag?"

"Dit is buite die kwessie Paul. Sahara gaan vir my en Lawrence uit neem dat gaan ons die aand by haar kuier en oorslaap."

"O jammer. Ek het nie geweet jy en Lawrence is nou, jy weet."

Larisa lag weer. 

"Nee glad nie Paul. Ons is net baie goeie vriende van ons eerste dag op skool af."

Sy wonder of Paul dalk net 'n tikkie jaloers is.

Paul is jaloers maar eerder op Lawrence.  Hy is nou wel Sahara se broer maar sterf liefde dan sommer net so? Die liefde was daar vóór hulle geweet het hulle het 'n bloedverbintenis.

"Dan praat ons weer Larisa. Ek sal in verbinding bly. Onthou die ete. Ek gaan jou nog uitneem. Totsiens."

Larisa se hart klop wild. 

"Ai Anton. Is dit te gou om so te voel? Vergewe my want ek is nog steeds lief vir jou."

Paul skakel weer Sahara se nommer. As sy nie dié keer antwoord nie weet hy nie wat hy gaan doen nie. Niks nie. Hy is so teleurgesteld. Nou is hy seker sy wil nie met hom praat nie. Hy gooi se sel op sy lessenaar neer. 

Martin en Rachel sit en gesels in 'n restaurant. 

"Dink jy nie dat ons tog Shane Cupido se hulp aanvaar om vir jou beskerming te kry nie Rachel. Daai broer van my is baie onstabiel. Ek sal myself nooit vergewe as hy jou wil laat seermaak nie."

"Hy sal nie Martin."

"Hoe seker is jy daarvan? Almal glo hy het sy eie dogter laat vermoor. Hoekom sal hy jou oorsien."

"Martin, as hy my kan seermaak kan hy jou ook seermaak. Jy wil nie bewaak word of wegkruip nie. So respekteer my ook. Ek kruip nie weg nie."

"Jou seun is alreeds dood as gevolg van sy bedrywighede. Ek kan nie glo ons het in dieselfde huis grootgeword en dieselfde waardes geleer nie."

"Martin, die meeste ouers leer nie hul kinders om die verkeerde dinge te doen nie. Dit is keuses wat hulle self maak."

Martin dink aan hulle as kinders. Max was altyd die selfsugtige een. As hy nie iets besit nie mag niemand anders nie. Hy het speelgoed van Martin of hul neefs altyd laat wegraak, per ongeluk gebreek of stukkend gesny.

Martin se katjie het 'per ongeluk' in die brandende kaggel beland. Hy het 'per ongeluk' oor 'n neef se hondjie met die fiets gery. 

Steven en Sarie sit langs mekaar in die prokureur se kantoor. Hulle het 'n oproep gekry om te kom. 

Albei van hulle se eerste gedagte was dat dit die ander se prokureur was en dat dit oor skei gaan.

Sarie het besluit dat as dit so is dan gaan sy dit nie teenstaan nie. Sy sal net inval indien die voorwaardes redelik is.

Steven is nie meer so seker hy wil skei nie. Hy is egter nog baie kwaad vir haar oor wat met hul kind gebeur het. 

Die prokureur het hulle so pas meegedeel dat hulle gesamentlike erfgename van Willem se bates is. Hy sê egter ook dat hulle dalk niks daarvan gaan kry nie want as die staat kan bewys dat dit uit geld bekom is wat uit misdaad voortspruit gaan die staat dit konfiskeer. Dit beloop tussen R15 en 20 miljoen.

Daar is egter 'n lewenspolis van so by die R5 miljoen wat eweredig tussen hulle en Sally opverdeel moes word. Indien iemand weggeval het dan word daardie persoon se uitbetaling verder eweredig verdeel tussen die oorblywendes.

Dit is nou iets wat uit die bloute kom. Hulle sou nooit kon dink dat Willem dit sou doen nie. Dan is hulle ook geskok om te weet dat Willem se bates soveel beloop.

Steven weet nie wat om te dink van dié geld nie. Sal dit nie Sally se waardigheid verder ontneem nie; haar herinneringe besoedel nie? Hy is nou wel arm maar geld is nie alles nie.

Hy het tyd nodig om te dink wat om daarmee te doen.

Sarie is nog te uit die veld geslaan. Sy weet nie wat om van dit alles te maak nie.

***

Hebreërs 13:5 Julle gedrag moet vry van geldgierigheid wees. *Wees tevrede met wat julle het, want Hy het gesê: *Ek sal jou nooit begewe en jou nooit verlaat nie.

©Rooi Mier 13.07.2022

#Stukkendeharte Hoofstuk 54 - Rooi Mier

"Goeie middag. Hier volg die nuusflitse.

In 'n nuwe verwikkeling rondom die mensehandelaar en dwelmbaas, Max Adriaanse alias Meneer M, CCTV beeld van 'n restaurant in Oos Londen hoe hy rustig sit en eet 'n dag nadat hy verdwyn uit van die plaas buite George. Die publiek word gevra om op die uitkyk te wees maar die polisie waarsku weereens dat hy nie genader moet word nie want hy is uiters gevaarlik.

Shane is briesend. Wie het die inligting laat uitlek dat Max in 'n restaurant was? As dit enige iemand in die mag is gaan daardie persoon aan die pen ry. As dit direk van die media af kom gaan hulle weer wegkom met die vryheid van die media storie. In Suid Afrika het almal mos vryheid om te maak net soos hulle lekkerkry.

Paul kan vandag nie sy gedagtes weg van Sahara af kry nie. Hy sal moet 'n plan beraam om met haar te praat. Hy het nie 'n goeie indruk op haar gemaak nie.

Die enigste manier sal wees om haar direk te kontak en reguit te vra of hy haar iewers kan ontmoet in die publiek. Dit behoort haar gerus te stel dat sy nie alleen met hom gaan wees nie. Of sy hom gaan ontmoet is die eintlike vraag.

Hy haal sy foon uit.

"Skakel Sahara!"

Die oproep gaan deur maar die haar foon lui net. Hy wonder of sy sy nommer op haar foon gestoor het en nou nie wil antwoord nie.

"Ai. Hoekom moet die lewe so ingewikkeld wees."

Sahara is nog af die week. Sy is besig om 'n gedig te skryf. 

"Die mense kan so verkeerde tye bel."

Sy loer na die skerm en sien dat dit 'n ongelyste nommer is. Sy besluit om dit te ignoreer. Vandag kry sy weer swaar. Lawrence is al die hele dag op haar gedagtes. Die enigste raad is om maar te skryf.

Larisa stap uit die eksamenlokaal. Sy is tevrede. Dit was so moeilik om te konsentreer terwyl sy studeer het dat sy gedink het sy gaan vandag vou. 

Haar gedagtes was gedurigdeur by Yvonne wat nou nie vry kan wees nie net omdat sy in die eerste plek nie wou luister nie. 

Dan weer is haar gedagtes by Candice. So jammer dat so 'n jong lewe daarmee heen is. Sy dink soms sy is wreed maar die gedagte kom elke keer op dat sy beter af is as wat sy sou bly lewe het en dalk nog baie ander mense se lewens in gevaar sou stel. Sy dink nie dat dit Candice se verdiende loon is nie; net dat sy beter daaraan toe is.

Wat Larisa egter die meeste pla is die hoeveelheid kere sy aan Paul dink. Sy ken die man skaars. Gisteraand het sy eintlik 'n grap daarvan gemaak. Sy het met hom gepraat.

"Paul, wat soek jy in my kop? Klim uit!"

Daarna het sy lekker sit en lag vir haarself. Dit sou seker nie 'n probleem gewees het as sy nie so skuldig gevoel het agterna nie. Na dit voel dit altyd Anton staan daar en glimlag vir haar.

Alles het egter goed afgeloop met die eksamen.

Lawrence sit met die name waaruit  hy sy prinsessie se naam moet kies. Hy het drie name waarvan hy een moet kies. Miskien moet hy maar twee kies. Drie is weer te veel. Hy sal maar al drie aan Janice stuur en sê wat sy keuse is. Sy kan dan die besluit maak of sy drie wil hê. Volgens hul ooreenkoms moet die dogtertjie se name van hom af kom.

Hy stuur die whatsapp boodskap deur.

" Die name wat ek vir prinsessie het is Lanice Lauren van Wyk.

Ek het 'n derde naam maar jy kan besluit of sy 'n derde naam moet hê. 

Die derde naam is Janique. Laat weet  maar asseblief.

Meneer M het nie die oorspronklike berig gesien waar Rachel en Martin sy identiteit bekend maak nie. Hy het egter op 'n program waar sake van die dag bespreek word op die brokkie nuus afgekom.

Die pyn wat hy aan sy familie en veral sy vrou, veroorsaak het met sy kastige dood en begrafnis is 'n groot besprekingspunt. Die paneel wil weet hoe 'n mens jou vrou soveel pyn kan versorg. Hy het 'n dokter of dokters omgekoop om hom met 'n terminale siekte te diagnoseer, hom dood te verklaar en die begrafnis. Dit is 'n teken van hoeveel mag hy ook gehad het.

'n Ander besprekingspunt was die feit dat hy sy dogter betrek het. Almal op die paneel wonder of die moord op Candice op sy bevel was. Die mense wat inbel sê dat hy die harteloosste mens is wat hulle ken.

"Ken? Julle ken my van geen kant af nie. As julle dink ek is klaar, dan moet julle weer dink. Pas maar julle dogters en seuns mooi op skynheilige koeie. Sodra die stof gaan lê het is ek terug.

Ja jy auntie wat so sê die Here gaan hom in die hande kry. Voor Hy dit doen gaan ek eers jou kind verkoop. 

Jy moedertjie wat swanger is; jou kind gaan my dwelms koop. 

Pa, jy wat sê hoe jy my gaan skiet as ek aan jou kind raak, jou kind gaan vir my werk om kinders te ontvoer.

O jy het ook iets te sê Kommisaris van die polisie. Jou polisiemanne en vroue ontvang hul betaling van my af. Veel meer as wat jy hulle kan betaal. Lei hulle maar goed op om vir my te werk.

En jy wat jou tande sit en slyp om my gebiede oor te vat met jou bietjie dwelms. As ek jy was het ek nou al begin hardloop. Meneer M gaan nie dood nie. Hy rus maar net 'n bietjie."

Iemand sê dat hy die skuim van die aarde is en van die aarde af weggevee moet word.

Max bars uit in 'n harde onbeheerde lag. 

"Hoor hoe lekker laat jy my nou lag."

***

Psalm 74:22 Staan op, o God, verdedig u saak; dink aan die smaad wat U die hele dag aangedoen word deur 'n dwaas.

23 Vergeet nie die geroep van u teëstanders nie — die rumoer van u opstandige vyande, wat altyddeur opgaan!

©Rooi Mier 13.07.2022

#Stukkendeharte Hoofstuk 53 - Rooi Mier

"Daar is nuwe verwikkelinge rondom die ondersoek van die geheimsinnige Meneer M. In 'n skokkende ontwikkeling nuwe getuies het aan die lig gekom dat Meneer M eintlik Max Adriaanse is. Hy was voorheen bekend in misdaadkringe as een van die grootste dwelmbase.

Max Adriaanse het destyds verdwyn en later is vasgestel dat hy Namibia toe verhuis het en glo daar gesterf het. 

Sy broer en sy vrou het toevallig twee dae gelede na 'n nuusberig ontdek dat Meneer M eintlik die 'afgestorwe' Max is. Hulle was beide baie geskok en het die volgende dag dié ontdekking met die polisie gedeel.

In die ontvouing van gebeure was Candice Williams, wat verlede week gearresteer was as lid van Meneer M se bende, dood gevind is in haar sel. Dit wil voorkom dat sy vermoor was.

Daar is nog 'n verdere skokkende onthulling. Candice Williams was die biologiese dogter van Max Adriaanse. 

Nog 'n voortvlugtige lid van die bende is op dieselfde dag in 'n motorongeluk dood.

Hier is foto's van Max Adriaanse. Die polisie vra dat die publiek asseblief nie hom sal nader indien hulle hom iewers waarneem nie maar eerder die polisie sal kontak."

Larisa sit geskok en luister na die nuus. Sy het nooit regtig vattigheid aan Candice gehad nie maar sy sou haar beslis nie dood wou gehad het nie.

Sy was bly om te verneem van Yvonne se redding. Sy sal graag op haar vriendskap met Yvonne wou voortbou.

Sy sien uit na die komende naweek. Sahara  het haar en Lawrence genooi om Saterdagaand by haar te kom oorslaap. Sy het dit nodig want die eksamens het begin en sy het 'n breek nodig. Die naweek in Lawrence se teenwoordigheid sal natuurlik weer sterk herinneringe na vore bring. Larisa het egter geleer om daarmee saam te lewe. Daar vloei nog gereeld trane en sy hoor nog soms sy liefdesverklaring, maar dit los haar nie meer met hopeloosheid agter nie. Sy is van plan om Sondagoggend vroeg weer terug te kom. Sy skryf die Maandag.

Martin en Rachel het ook so pas die oggend nuus gekyk. Dit skok hulle om uit te vind dat Max 'n dogter het wat betrokke was by sy misdadigheid. 

"My broer was 'n vark. Hoe betrek jy jou eie kind by jou misdade? Net iemand harteloos doen dit."

"Wat my die meeste pla is dat sy vermoor is en op dieselfde dag is daar nog een van sy bendelede dood in 'n ongeluk. Daar steek iets meer in Martin." 

"Ek is glad nie verbaas nie. Niks omtrent my broer skok my meer nie. Dit is net so jammer dat my klein niggie dood is voordat ek haar ontmoet het.

Een van die dinge wat jy my gevra het om te ondersoek was die moontlikheid van 'n dogter. Wel, dit is nou bevestig. Jou man het nog 'n kind gehad."

Lawrence lê nog in sy bed. Hy skryf nie vandag nie. Hy dink daaraan om later te begin studeer. Vir nou wil hy net ontspan. 

Hy kan egter nie heeltemaal ontspan nie. Binne 'n paar weke gaan sy tweeling gebore word. Hy moet nog met 'n naam opkom vir sy prinsessie. Janice gaan die naam van die bulletjie gee.

Op die oomblik sit hy met drie name. Hy moet nog op 'n finale naam besluit. Die dokter het juis gesê dat tweelinge onvoorspelbaar is. Soms maak hulle vroeër hul opwagting. Hy is dankbaar dat hulle die geslagte van die kinders weet. 

Daar sou beslis nie tyd gewees het vir 'n geslagsonthulling partytjie nie. Hy stuur vir Janice drie name waaruit hy gaan kies. Dit is nou sy kortlys.

Janice is ongemaklik groot. Sy moet nog 'n laaste draai by die babawinkels maak voor die twee gebore gaan word. Sy wil liewer tuis wees as die pyne begin. So opgewonde sy is, so wens sy die dag kan nou aanbreek. 

Sal sy die pyn kan hanteer? Biljoene vroue het al voor haar. Hoekom sal sy nie ook kan nie. Dit help egter nie. Mense sê altyd dit is die seerste pyn wat 'n mens kan ondervind.

Sy moet ook nog 'n naam vir haar ongebore seuntjie kry. Sy wens Lawrence se eksamens was al verby. Sy het hom hier nodig. Hy het nou die dag van hul toekoms gepraat.

Vir haar klink dit hy sien hulle saam. Sy wonder soms of hy oor Sahara is. Dit is maklik om te sê hy moet net, maar is hy werklik? Sy wil nie 'n gedwonge keuse wees nie.

Hy moet haar kies omdat hy lief is vir haar en nie omdat hy nie sy suster kan trou nie. Sy is nogal jammer vir hulle maar weet dat haar kanse omtrent zero sou wees as hulle nie 'n verband gehad het nie.

Dit het op 'n tyd onkeerbaar gelyk. Nou is Sahara haar babas se auntie. Die noodlot is soms 'n grapjas. Dit plaas jou in die onmoontlikste posisies.

Shane en sy span gaan van vandag af baie leidrade moet opvolg. Dit gaan altyd so wanneer iemand gesoek word en dit word bekend in die media. Die probleem is dat hulle nie 'n enkele leidraad of sogenaamde leidraad kan afmaak as niks nie. Dit is dalk net daai een wat jou op die spoor van die voortvlugtige plaas.

Die sosiale media is aan die brand met dié storie. Hulle het selfs vir Meneer M gister by die Augrabiese Watervalle gesien. 

Gavin of te wel G, geniet die dorpie waarheen hy onder polisiebewaking is. Sy voorkoms moes hy verander. Hy sny nou al sy hare af, dra altyd 'n pet en gaan nooit alleen uit nie. Hy wens net dat hy vir Yvonne kan sien. Hy het hopeloos lief geraak vir die meisiekind. Hy wonder egter of sy vir hom sal kans sien. Hy was dan deel van die mense wat haar haar vryheid wou ontneem. 

***

1 Kor 13:7 *Dit bedek alles, glo alles, hoop alles, verdra alles.

8 Die liefde vergaan nimmermeer;  ..

©Rooi Mier 13.07.2022